ပေါက်ဆိန်ကျော်သန်းအမှတ်ရ

ပေါက်ဆိန်ကျော်သန်းအမှတ်ရ
===================

ဂိုးချေ သီကျလားယာဆိုကေလည်း
ရခိုင့်တော်လှန်ရီးသမိုင်း
ဗလဗွီ ဒေလီက နိုင်ငံရီးသမိုင်းမှာ
နာမည်တလုံးတင်ကျန်ရစ်ခ
ယင်းချင့်က "ပေါက်ဆိန်ကျော်သန်း"
လာမစမ်းကဲ့ နှစ်ခြမ်းကွဲဖို့။

ဂိုးချေမဟိယာဖြစ်လို့
အေဂု ကောင်းကောင်း
လိုင်ခြောင်းကျယ်နီကတ်တေ။

Facebook ထက်မှာ
ဝက်ခွတ်ဒါးကို ထောင်ပြ
လိုင်သားတက်နီကတ်တေ။

ကရာတေးလား Boxing လား
လက်ခြီကားရား
ကျော်သန်းနန့်တွိကေ ဗြားစား
နှစ်ခြမ်းကွဲယာ မှတ်ထား။

ပညာဟိပေါရေအရပ်မှာ
ထမင်းချက်ဖို့လူမဟိ
ပေါင်ချေလှုပ်လို့
အုတ်ဖို့အကောင်တိကျည်းယာ။

ပညာဟိပေါရေအရပ်မှာ
ကန့်ကွက်တေလူမဟိ
အားလုံး သဘောတူထောက်ခံပါသည်။

ပညာဟိပေါရေအရပ်မှာ
အားလုံးမှန်ပါသည်။

ပညာဟိပေါရေအရပ်မှာ
အားလုံး သူရဲကောင်း ရဲရဲတောက်
ကြောက်မွှီးတပင်မပါ
ရန်သူရောက်ကေ ယနာနာ။

Project တခု ကျလာကေ
ခွီးပိုင်ယှောင် လုကတ်တေ ကိုက်ကတ်တေ
လုပ်ဖို့ခါ တကောင်ချေလည်း မလာ
အုပ်ဖို့ခါ ပျာယိပျာယာ။

စဉ်စားကေ ဒေါသထွက်တေ
ဒူးထောက်လားခကတ်တေ
လွတ်မြောက်လားခကတ်တေ
ပြင်ခံဝတ်လို့ Online ထက်မှာ
မြောက်ကြွ မြောက်ကြွ ဘောရိပြ
ချောတိုင်တက်နီကတ်တေ
အကောင်ကြီးကြီး
နဖူးမှာ စာရွီးထားကတ်တေ
ပညာဟိ သူရဲကောင်း ရဲရဲတောက်
လိုင်ခြောင်းခြောက် လောင်းမှောက်တိကို
(အဂယင့်) ဂိုးချေပိုင်ယှောင်
ပေါက်ဆိန်နှင့်
နဖူးကို နှစ်ခြမ်း ခွဲပစ်လိုက်ချင်ရေ။

သာလှဧူး (မြောက်ဧူး)
October 19, 2020