နာမည်ကြီးချင်ကေ
တော်လှန်ရေးမလုပ်ကဲ့
နေတိုးရို့ပိုင် မင်းသားလုပ်
လက်မထွဋ်ချေနှင့်
တွဲခုတ်ရခန့်ယေ။
နာမည်ကြီးချင်လို့
တော်လှန်ရေးလုပ်ကေ
နာမည်မကြီး
ဝရမ်းပြီးဖြစ်တေ။
ဒုက္ခမခံနိုင်လို့ ဒူးထောက်ကေ
အောက်ရှောက်လို့
ကော်နှက်ကတ်ဖို့ယေ။
မသထာကေ
ဖွတ်ပြောက်လို့ အဆဲခံရဖို့ယေ။
နာမည်ကြီးချင်ကေ
နေတိုးရို့ပိုင် မင်းသားလုပ်
တော်လှန်ရေးမလုပ်ကဲ့။
တော်လှန်ရေးဆိုစွာ
နှပ်မစင်ရေအချေတိ ကဇတ်တေ
အိုးချေခွက်ချေမဟုတ်။
မင်းသားဖြစ်ဖို့လားလို့ တော်လှန်ရေးလုပ်ခီမှာ
သာလှဧူးမှာ မင်းသားမဖြစ်
ဖွတ်ခေါင်းဖြစ်တေ။
ကံမကောင်းခါ ဆာလည်းဆာ နာလည်းနာ
တပ်ပျက်မှာ ဗိုလ်ဖြစ်
ခေတ်ပျက်မှာ ဝန်ကြီးချုပ်ဖြစ်တေ။
ကံဆိုးခါ ကျားဂေါင်းမှာ အိုးစွပ်
ဝဋ်လိုက်တေ။
(သာလှဧူး (မြောက်ဧူး)
March 10, 2022 (Thursday)
No comments:
Post a Comment