Friday, August 31, 2007

နောက်ဆုံးတိုက်ပွဲ

ရကေရ မရကေ တိုက်
တိုက်ယင်းနန့်သီ အာဇာနီ --။

အေတခါ နောက်ဆုံးတိုက်ပွဲ
ရဲဝန့်စွန့်စား ပိုင်းခြားစီရင်
ငါရို့သည်ဘုရင် --။

သွီးပွက်ပွက်ဆူ
နီပူရဲရဲ ချွေးတပြစ်ပြစ်
တော်လှန်ရေးတေးခြင်းသစ်ကို
သံပြိုင်ဟစ်သီဆို အောင်လံကိုထမ်း
တလှမ်းချင်းချီတက် --။

မိစ္ဆာဖွတ်ပြောက် လောင်းမှောက်တိကို
တယောက်မလွတ် သံခြီချင်းခတ်
ပူးပြွတ်ချိုင်နှောင် --။

ဘုရားရှိ ဒူးထောက်
ကြောက်ကောင်းထမန်း ဂယောင်ဂယမ်း
ပုတီးစိတ် ပရိတ်ရွတ်လက်များ
တဇတ်ဇတ် တဖြတ်ဖြတ်တုန်ယင်
အသင်လူသား ဘ၀နောက်ဆုံး နိဂုံးမဟုတ်
လွန်ကျူးအပြစ် ဦးခိုက်ကန်တော့
ခွင့်လွှတ်ပါယင့် --။

လူတိုင်းကိုယ်စီ ကြိုးတပင်စီယူခ
သူရို့အတွက် နောက်ဆုံးလက်ဆောင်
ပို့ဆောင်နှုတ်ဆက် ကြွမြန်းရာလမ်း --။

ငါရို့အတွက် နောက်ဆုံးတိုက်ပွဲ
လွတ်မြောက်ရေးခရီး
မ၀ီးရောက်ပျာယ်
ဂေါင်းမော့ရင်ကော့ ကျင်ကွင်းကလိုက် --။

အာရုံမိုးထက် ကောင်းခြင်းမင်္ဂလာ
ချမ်းအီးသာစွ --။

နီခြည်အလင်းတန်း လန်းဆန်းဝီဖြာ
လှပပါယင့် --။

(သာလှဦး)

Tuesday, August 21, 2007

ALONE TRAVELER

(Rain)
Falling down heavily,
And it pours all the fields,
The river is
Flowing on forever.

(Summer)
Hot is the weather
And it is so painful,
The desert is
Dry always.

(Winter)
Chill is the wind
And it is so snowy,
The world is
Cold all the time.

(However)
I will continue my journey.
I am alone,
But I am not lonely.
Against the current,
Through the piercing wind,
I will cross the sea.

(Tha Hla Oo)

Monday, August 13, 2007

ဇာကိုလားလို့ ဖြေရမည်

ဆီးနှင်းစိုစို ပြာသိုလည်းလွန်
လက်ပံပွင့်ဖူး ရာသီပြောင်း၍
တပေါင်းကူးသော် --။

ဝမ်းနူးစဖွယ် တောမြိုင်လယ်မှာ
တွန်မြည်ယင့်ယင့် ရင်ကိုဖွင့်လျှက်
ပင်မြင့်ထိပ်ချာ ကိုင်းအညှာမှာ
နားကာလှမ်းထောက် မြကန်သာကို
ဝဲလာရောက်ကာ ရီသောက်လာသော
ဥသြရွယ်ပျို သာခြင်းဆိုကေ
ဇာကိုလားလို့ဖြေရမည် --။

တောင်ကမူမှာ ဂူလည်းပြိုပျက်
နွယ်မြက်ဆောင်းဆောင်း တရောင်းရောင်းဖြင့်
ရှိဟောင်းဘုရား ဥက္ခောင်းကျိုးမှာ
ဂြိုးညိုနားကေ ဇာကိုလားလို့ဖြေရမည် --။

ညောင်ကြပ်မြီမျို ဇာတီအိုလည်း
ပြိုပျက်ယိုယွင်း ကိုးကွယ်သူလေ
လူသျှင်ကင်းလို့ သတင်းနီဝင်
လပပြင်မှာ ဟင်းလင်းမြင်ကေ
ဇာကိုလားလို့ဖြေရမည် --။

(သာလှဦး)

Wednesday, August 8, 2007

သူရဲကောင်းရို့၏၀ိညာဉ်


တောင်ကိုဖြိုရေဆိုမှ
ဆောက်နန့်ထွင်းနီလို့ ဇာဖြစ်ဖို့လဲ --။

ဘူဒိုဇာနန့်တိုက်
ဒိုင်းနမိုင်းနန့် ဖောက်ခွဲပစ်ရဖို့ --။

ရန်သူကို အထင်ကြီးနီကေ
ဇာပိုင်လုပ် (ရန်-ငါ) ဒါးကို
ခြားနိုင်ခန့်သိမ့်လဲ --။

ရန်သူကို ချီကျူးနီကေ
ဇာပိုင်လုပ် သူ့ကို မိတ်ဆွေလို့သတ်မှတ်
ပိုင်းဖြတ်နိုင်ခန့်လဲ --။

ရန်သူစွာ ငါရို့ကျောင်းသားတိ၏သွီးနန့်ခြယ်မှုန်း
သီကုံးပန်းကို
ဘုရားတင် ပူဇော်နီလီယင့် --။

ရန်သူစွာ ပြည်သူရို့၏မျက်ရည်စကို
မသထာရည်စာသောက်သုံး
ရွှင်ပြုံးနီလီယင့် --။

ရန်သူစွာ ဆယ့်နှစ်ကြိုးပိုင် တဆီစုန်းမတကောင်ပိုင်
ငါရို့၏၀ိညာဉ်ကိုယူနှုတ်လို့
တဖြုတ်ဖြုတ်ကျကြွီလားခရရေ
သူရဲကောင်းတိ မရွီတွက်နိုင်ဗျာယ်လေ --။

(သာလှဦး)

Thursday, August 2, 2007

စောင့်မျှော်ခြင်း


လူ့ဦးနှောက်ကို
ရီရောခံလိုက်ရရေအခါ
သကြားမပါရေ လဖက်ရည်တခွက်ပိုင်
အရသာ ပေါ့ပျက်လားရေ --။

အသားကျနီရေ ပန်းဖော်ဒယောတထည်စွာ
ဈီးကြီးကြီးပီးဝယ်ရရေ
ပိုးသားထည်အသစ်တစုံထက် ပိုကောင်းရေ --။

အ၀ီးက ရှုမျှော်ခင်းကို
လှမ်းမျှော်ကြည့်လိုက်တေအခါမှာ
သူ့တဲအို ယွင်းယိုလားရေ --။

သွားကျိုးနီရေ
ခါးကုန်းကုန်းမိခင်၏မျက်နှာထက်က
ယော့ရိယော့ရဲ အပြုံးလှလှတပွင့်စွာ
သူ့အတွက် အဓိပ္ပါယ်မဟိလိုက်ပျာယ် --။

ငါးမပါရေ ငရုတ်သီးငပိထောင်းတခွက်စွာလည်း
သူ့အဟာရ အာသီသကို
မဖြည့်စွမ်းနိုင်ဗျာယ် --။

သူ့အိမ်မက်တိစွာ
ကြွီလွင့်နီရေ နွီရွက်ဝါချေတရွက်ပိုင်
တွားလားနီရေ မြွီတကောင်ပိုင်
တဖြတ်ဖြတ်လူးလွန့်လို့
တွန့်မြူးနီလီယင့် --။

သူဖတ်နီက ဓမ္မသစ်ကျမ်းက
ကျမ်းပိုဒ်တိလည်း
လိုရင်းကို မယှင်းနိုင်ဗျာယ် --။

ပြီးကေ သူစွာ
မိခင်အိုကိုနောက်ခိုင်းလို့
နှုတ်မဆက်ဘဲ ရုတ်တရက်ထွက်ခွာလားရေ --။

အေနိထက်ထိ မိခင်အို
သူပြန်လမ်းကို မျှော်မှန်းလို့
တမ်းတစောင့်စားလျှက်ပါ --။

(သာလှဦး)