ဘ၀ဒဿန

ဘ၀ဒဿန
=======

ဆိတ်ငြိမ်အီးချမ်းရေ ရွာချေတရွာကြား
ဖြတ်စီးလားရေ ချောင်းကမ်းနားမှာ
ငါးမျှားနီရေ ကုလချေတယောက်၏ကိုင်းတံပိုင်
ကျွန်တော်ရေ
ဖြောင့်လည်းဖြောင့် ကောက်လည်းကောက်
လူထဲက လူတယောက်ပါ --။

ဝမ်းရေးအတွက်
တနပ်ထမင်းကို ရှာကြံစားသောက်ယင်း
ဘ၀ပယိုင့်ကို ဇလွယ်သိုင်းလို့
အရိုင်းတောနက်မှာ
ကျင်လည်ကျက်စားခရရေ လူတယောက်ပါ --။

ဗုဒ္ဓဘာသာဆိုကေလည်း
သူတပါးအသက်ကို သတ်ဖြတ်လို့
ပါဏာဋိပါဋာကံကိုလည်း
ကျူးလွန်ဖူးခပါရေ --။

မုသ၀ါဒါကို အဓိပ္ပါယ်မဖွင့်တတ်ကေလည်း
လိမ်ဝါရေဆိုစွာ ကျွန်တော်နားလည်ပါရေ --။

အချစ်မှာ ခြီကျွံလို့
အပြစ်တခါးပိုက်နန့်
ဓမ္မသစ်ကျမ်းကိုလည်း ဖတ်ဖူးပါရေ --။

နားလည်၏ နားမလည်၏
ကျွန်တော်မသိပါ
ဝိပဿနာ ရှုစားစွာမဟုတ်ကေလည်း
ဥပေက္ခာပွားများလို့
ကျွန်တော်အိမ်က ထွက်ခွာလားသူပါ --။

နီမကောင်းလို့
စွပ်ပြုတ်ရည် ပူပူတခွက်သောက်ချင်မှ
အိမ်က အမိကို သတိရရေ --။

တော်လှန်ရေးဆိုရေ
အကွေ့အကောက်များရေ
မက္ခရာနယ်မြီထဲသို့ဝင်ရောက်
လမ်းစလည်း ပျောက်ဖူးပါရေ --။

အမှန်တရားအတွက် တိုက်ပွဲဝင်ယင်း
တရားအမှန်ကို ကျွန်တော်မသိခပါ --။

ပျောက်ယင်းရှာ ရှာယင်းပျောက်
အမှောက်မှောက် အမှားမှား
ပြောက်ကျားတယောက်လည်း ဖြစ်ဖူးပါရေ --။

(Non-Violence) ကို ကျင့်သုံးရေဆိုခါမှ
ပေါက်ခါနီး မီးတောင် (Volcano) တခုပိုင်
ကျွန်တော့်ရင်ထဲ ဒေါသတိပိုများလာရေ --။

တိုက်ဖို့ရန်သူက အားကောင်းလို့
ကျွန်တော့မှာ အပ်တချောင်းတောင်မဟိပါ --။

နိုင်ငံရေးပုစ္ဆာကို အဖြေရှာဖို့ကြိုးစားယင်း
ဝမ်းရေးပြဿနာ မဖြီယှင်းနိုင်သူတယောက်ပါ --။

ပဋိပက္ခနန့် ၀ိရောဓိ
အခုထက်ထိ မသေးကွဲ
ဘွဲ့လည်းရဖူးပါရေ --။

သူများကို ဝေဖန်လို့
ကိုယ့်ကျ မခံ
တန်ပြန် လျှာလှံနန့်ထိုးသူပါ --။

သတ္တ၀ါရို့သည်
သူတပါး၏ (နှမ်းစိလောက်) အပြစ်ကို မြင်လွယ်၏
မိမိ၏ (ထန်းသီးလောက်) အပြစ်ကို မြင်ခဲ၏ - ဆိုရေ
ဓမ္မပဒ ဂါထာကို
အပြန်တရာ ဖတ်ကေလည်း
အခုထက်ထိ နှုတ်ကျက်
မရသိမ့်ရေ လူပါ --။

ယေကေလည်း ကျွန်တော်
ဇွဲမလျော့ပါသိမ့်
ဆက်တိုက်ရဖို့ တိုက်ပွဲအတွက်
အားသစ်တဖန်ပြန်မွီး
ဒါးသွီးလျှက်ပါ --။ ။

သာလှဦး
(23/2/99)