(၁၉၇၅ ခုနှစ် မြောက်ဦးမြို့ သင်္ကြန်သံကျပ် ပထမဆုရ နတ်သာခြင်း)
မြောက်ဦးတွင်လတ် သမိုင်းမှတ်
ဂုဏ်ပေါင်းခညွတ် ဘုမ္မိရပ်
မြောက်ဦးတွင်လတ် ဘုမ္မိရပ်လေး။
သင်္ကြန်တွင်းမှာ ဆင်းလို့လာ
မဟာအထွဋ် မြောက်ဦးနတ်လေး။
ဒုံးပျံမစီး ဒေနတ်ကြီး
နတ်ကြီးမဟာ ခြီကျင်လာလေး။
လူစိတ်ကိုဖျောက် နတ်စိတ်ရောက်
တောင်မြောက်ဝဲယာ ကြည့်လတ်ယာလေး။
ကြည့်လိုက်တိုင်းပင် ငါနတ်မြင်
မဏ္ဍပ်ထဲတွင် ငါနတ်မြင်လေး။
ဒေမဏ္ဍပ်သူ နှမဖြူ
တမူကွဲပြား ၀တ်အစားလေး။
လုံအောင်မဆင် အဆန်းထွင်
မမြင်မကောင်း ချက်ဟောင်းလောင်းလေး။
လုံအောင်မ၀တ် အဆန်းတတ်
မအပ်မရာ ရှက်စရာလေး။
နတ်ကြီးအသျှင် မာန်စိတ်၀င်
ရီမလောင်းချင် ပြန်ဖို့ပျင်လေး။
ဟာဟေ နားမလည်ကေ အချေရို့ကို
ခွင့်လွှတ်ပါလေး။
တုန်ကာလှုပ်ကာ ပြန်ဝင်လာ
ဆောင့်ကာတုန်ကာ ပြန်၀င်လာလေး။
ရီစင်လောင်းချင် မဏ္ဍပ်၀င်
ကြင်သူနှမ အယင်ထလေး။
ယဉ်သူကျေးသူ ရခိုင်သူ
ကြင်သူနှမ ကြိုက်မဝလေး။
မြင်သူငေးသူ သဇင်ဖြူ
ကြင်သူနှမ ချစ်မဝလေး။
ဖလားကိုကောက် လက်ကိုမြှောက်
တပေါက်ရီစင် လောင်းအယင်လေး။
နှစ်ယောက်တူပြိုင် မညောင်းနိုင်
သူနိုင်ငါနိုင် မညောင်းနိုင်လေး။
မျက်နှာချင်းဆိုင် ဖလားကိုင်
သူနိုင်ငါနိုင် မညောင်းနိုင်လေး။
ဖလားကိုင်ကာ ရီလောင်းပါကေ
ကညာလည်းပျော် မောင်လည်းပျော်လေး။
မေတ္တာရီစင် လောင်းလိုက်လျှင်
နှမလည်းကြင် မောင်လည်းကြင်လေး။
ဟာဟေး မောင့်မှာရာလည်းပင်ပန်း လက်နှင့်ခြီလေ
ခွီယိုင်နွမ်းကေ ပန်းလှမယေမေဇူ သဇင်ဖြူမှာ
ရီစင်အီးကို ဖြန်းပီးပါလေး။
No comments:
Post a Comment