Friday, June 13, 2025

ရခိုင်ပြိုင်လောင်းသံကျပ်



ရခိုင်ပြိုင်လောင်းသံကျပ်
===============

ပြိုင်လောင်းပွဲ အားပီးလာ
အရီးအခင် မာပါယင့်လား။

ခေါက်ထီးဆောင်းလို့ မမလေ
ဂေါင်းကိုစကေ ဖွင့်လို့ပြလိုက်။

ပြုံးစိစိနှင့် မမချေ
ပါးချိုင့်ချေနှင့် ချစ်ကောင်းထမန်း။

သနပ်ခါး ပါးလဝိုက်ကျံ
အဂယင့်အမှန် ချစ်ကောင်းထမန်း။

ရွှေဘယက်ကြီး အကြီးမသန်
ဘုန်းနှင့်ကံနှင့် သူဌီးမကြီး။

ပြိုင်လောင်းပွဲ ပွဲကြည့်လာ
အားလုံးကျမ္မာ မာကတ်ယင့်လား။

ပြိုင်လောင်းပွဲ အားပီးလာ
ပွဲကြည့်လာရေ ပရိဿတ်အပေါင်း
ကျမ္မာစီကြောင်း ဆုတောင်းဆုတောင်း
ငါရို့နိုင်ဖို့ ဆုတောင်းဆုတောင်း။

ဆုတောင်းပီးလို့ ငါရို့နိုင်
သံကျပ်မြိုင်မြိုင် ထိုးခပါယင့်။

(မောင်ရို့မောင်ရို့)(လေးလေးလေးလေး)၂ (မောင်ရို့မောင်ရို့)

သုံးတောင်ကျော်လို့ ခွတ်လတ်တေ
ဆယ်နှစ်လံရှည် ငါရို့ပြိုင်လောင်း။

ပြိုင်လောင်းအပြည့် ငါရို့ထိုင်
အားကောင်းမောင်းသန် ရခိုင်သားတိ။

လူစိတက်စိ ထိုင်ပြီးသကာ
ဦးစီးဆရာ သံကျပ်ထိုးလို့။

နောက်ကလောင်းတိ တန်းလို့စီ
တက်ညီလက်ညီ ပျော်ကောင်းထမန်း။

အောင်လံကိုထမ်း ငါရို့လာ
ဝမ်းပန်းတသာ ကြိုလိုက်ဆိုလိုက်။

အပွဲပွဲ နွှဲလို့လာ
ယှုံးရေဆိုစွာ တခါမဟိ။

အမျိုးဇာတိ ရခိုင့်မာန်
ရခိုင့်အောင်လံ လွှင့်လို့ထူလို့။

ဇမ္ဗူတလွှား များထင်ပေါ်
ဟိုးဟိုးကျော်ရေ ရခိုင်သားတိ။

အပွဲပွဲ နွှဲလို့လာ
ယှုံးရေဆိုစွာ တခါမဟိ။

(အောင်တပ်ချောင်း သောင်းသောင်းညံ
ပြိုင်လောင်းလှော်သံ မကြားကတ်လား။)၂

ဆံပင်နီကို ကြောင်တောင်ဆို့လို့
ကြောင်နံသာနှင့်အလားတူ
ဘိန်းဘင်းသောက်လျှူ ရခိုင်သားတိ။

ဖျာလိပ်ခေါင်း ဂေါင်းထက်တင်
ယောက်ဖခေါ်ချင် နီကတ်တုန်းသိမ့်။

မက္ကလာကို ဂေါင်းမှာဆောင်း
ကမ်းထောင်းထက်က မရီးချေ
လူးကျလိမ့်မေ သတိထားကတ်။

ပဋရီကို ဂေါင်းမှာစွပ်
အမတ်လောင်းကြီးကြွလို့လာ
လက်ခုပ်သြဘာ ပီးလိုက်ပီးလိုက်
လက်ခုပ်သြဘာ တီးလိုက်တီးလိုက်။

မပီကလာ ပီကလာနှင့်
ဇတ်မင်းသားကြီး ဦးဖိုးစိန်
မစားရကေ နီလို့မကောင်း။

(အောင်တပ်ချောင်း သောင်းသောင်းညံ
ပြိုင်လောင်းလှော်သံ မကြားကတ်လား။)၂

ခွီးနှင့်ခဲဝါ တတူလာ
ခဲဝါကိုလွှတ် ခွီးကိုလိုက်သတ်။

(အောင်တပ်ချောင်း သောင်းသောင်းညံ
ပြိုင်လောင်းလှော်သံ မကြားကတ်လား။)၂

တက်ပဲ့မနိုင် ကမ်းပိုင်ချောင်းက
ဇာ (--) စုပ်ဖို့ လာကတ်တေ
ပြောလိုက်ရကေ လုံးဝမကောင်း။

(အောင်တပ်ချောင်း သောင်းသောင်းညံ
ပြိုင်လောင်းလှော်သံ မကြားကတ်လား။)၃



No comments:

Post a Comment