တတိယမြောက်ဦးခေတ်အလယ်ပိုင်းဟူ၍ ခေါင်းစဉ်တပ်ပြီးလျင် စီစဉ်ရွီးသားရခြင်းမှာ သက္ကရာဇ် (၉၇၄) ခု သီရီသုဓမ္မာရာဇာလက်ထက်တွင်သုံးစွဲခသော ငွေသားဒင်္ဂါးဟောင်းကို အစပြုပြီးလျှင် ရွီးသားဖော်ပြရခြင်းကြောင့် တတိယမြောက်ဦးခေတ်အလယ်ပိုင်းဒဂ်ါးဟူ၍ ခေါင်းစဉ်တပ်ရခြင်းဖြစ်ပါသည်။ ပဇာကြောင့် (တတိယမြောက်ဦးခေတ်) ခေါ်တွင်ရသနည်းဟူမူကား သက္ကရာဇ်(၄၄၉) ခုနှစ်တွင် ပထမမြောက်ဦးမြို့ကို တည်ထောင်တော်မူ၏။ ၄င်းသက္ကရာဇ်မှာ ခဆပဉ္စကိန်းကိုဖြို၍ ရွီတွက်လာသော ယခုကောဇာသက္ကရာဇ် အတွင်းတွင်ဖြစ်သည်။ (ဒုတိယမြောက်ဦးမြို့) ခေါ်တွင်ကြောင်းကား သက္ကရာဇ် (၇၉၂) ခုတွင် မင်းစောမွန်ကြီးသည် ဒုတိယမြောက်ဦးမြို့ကို တည်တော်မူသောကြောင့် ဖြစ်သည်။ (တတိယမြောက်ဦးမြို့) ခေါ်တွင်ကြောင်းကား သက္ကရာဇ် (၈၉၃) တွင် ဘ၀သျှင်မင်းဗာကြီးသည် တတိယမြောက်ဦးမြို့ကိုတည်တော်မူသောကြောင့် (တတိယမြောက်ဦး) တွင်သည်။ ၄င်း တတိဟမြောက်ဦးမြို့တည် မင်းဗာကြီး သက္ကရာဇ်(၈၉၃) မှအစ သက္ကရာဇ် (၉၇၄) ခုတွင်မြောက်ဦးမင်းဆက်အလယ်ပိုင်းသို့ကျရောက်နီပြီးဖြစ်သောကြောင့် မြောက်ဦးခေတ်အလယ်ပိုင်းဟူသော နာမကို ပီးရခြင်းဖြစ်သည်။
ယခုဖော်ပြပါဒင်္ဂါးပုံ (၁) ပုံမှာ သက္ကရာဇ် (၉၇၄) ခု သီရိသုဓမ္မာရာဇာမင်း လက်ထက်တွင် သုံးခသော ဒင်္ဂါးဖြစ်သည်။ ပုံ(၂) သက္ကရာဇ်(၁၀၀၀) နရပတိမင်းကြီး။ ပုံ(၃) သတိုးမင်းတရား။ ၄င်းမင်းကိုဖွားမြင်သောအခါက နက္ကဒါန်ထီးဖြူ အလိုလိုပွင့်သောကြောင့် (ထီးဖြူပွင့်မင်း) ဟုခေါ်၏။ ထို့ကြောင့် ၄င်းမင်းလက်ထက်သုံးစွဲသော ဒင်္ဂါးတွင် ကနက္ကဒါန်ထီးဖြူပွင့်ဟန် ဆွဲလွဲချရွက်သဏ္ဍာန်တွဲကျဟန် အနားရစ်ဖြင့် သွန်းလုပ်သည်။။ ပုံ(၄) စန္ဒသုဓမ္မရာဇာ သက္ကရာဇ် (၁၀၁၄) ၄င်းမင်းလက်ထက်တွင် (ဆင်ဖြူသခင်၊ ဆင်နီသခင်) ဟူသောဘွဲ့ကိုပယ်၍ (ရွှေနန်းသခင်) ဟူသော ဘွဲ့ကိုရာ ခံယူသည်။
ပဇာကြောင့်ဆိုသော် ၄င်းမင်းလက်ထက်တွင် ဆင်ဖြူတော်၊ ဆင်နီတော်ရို့ ကွယ်ပြီုးဖြစ်သောကြောင့် ဘ၀သျှင်မင်းဖလောင်းကြီးတည်ဆောက်တော်မူသော ရွှေစင်အတိ ခင်းစီအပ်သည့် အထွဋ်တော်မှန်ကင်းမှသည် မြီထဲ အုတ်မြစ်အစတိုင်အောင် ရွှေသားအတိပြီးသော နန်းမဆောင်၏ဗဟိုဆောင် တော် ရွှေအိမ်ကွမ်းပြောက်ကြီးကို ဂုဏ်ယူသည့်သဘောအားဖြင့် (ရွှေနန်းသခင်) ဟူသောဘွဲ့ကို ခံယူသည်။ ပုံ(၅) စန္ဒ၀ိဇယရာဇာ သက္ကရာဇ် (၁၀၇၁)။ ပုံ(၆ ) သက္ကရာဇ် (၁၀၉၃) ခုစန္ဒသူရိယရာဇာ။ ပုံ(၇) သက္ကရာဇ် (၁၁၉၉) မဒ္ဒရာဇ်ရာဇာ။ ပုံ(၈) သက္ကရာဇ် (၁၁၀၉) အဘယရာဇာ။ ပုံ(၁၀) သက္ကရာဇ်(၁၁၃၅) စန္ဒသုမနရာဇာ။ ပုံ(၁၁) သက္ကရာဇ် (၁၁၄၄) ခု စန္ဒပရမရာဇာ။ ပုံ(၁၂) သက္ကရာဇ် (၁၁၄၆) ခု အမရပူရ ဆင်ဖြူများသျှင်နိုင်ငံ။ ဤကဲ့သို့ မိမိ၏ဂုဏ်ထူးဘွဲ့ထူးများကိုခံယူကာ ငွေသားဒင်္ဂါးတွင် ဘွဲတံဆိပ်ခတ်နှိပ်ကြကုန်သည်။
တတိယမြောက်ဦးခေတ်အလယ်ပိုင်းတွင် သုံးစွဲသောဒင်္ဂါးများတွင် အစပိုင်းဒင်္ဂါးရို့မှာ မင်းဆက်ပေါင်း (၄၉) ဆက် ငွေဒင်္ဂါးအမျိုးပေါင်း (၄၉) မျိုး ဟိရမည်ဖြစ်ရာ နန်းသက်တိုသော မင်းအချို့ ဒင်္ဂါးခပ်နှိပ်ရန် မရကြကုန်။ မင်းဆက် (၄၀) ဆက် ငွေဒင်္ဂါး (၄၀) ပြားမျှရာ တွိရသည်။ ၄င်းဒင်္ဂါးရို့မှာ စုဆောင်းထားခသော်လည်း အင်္ဂလိပ်ဂျပန် ဒုတိယကမ္ဘာစစ်ကြီးအတွင်း စစ်ဘေးဒဏ်ကြောင့် ပျက်စီးယိုယွင်းခသည်ကတရပ်၊ မြောက်ဦးခေတ်အလယ်ပိုင်းအတွက်မျှရာ ဖော်ပြလိုသည်ကတကြောင်း ဤသို့သောအကြောင်းများကြောင့် ဤ (၁၂) ဆက်သော မင်းစဉ်ဒင်္ဂါးများကိုသာလျှင် ဖော်ပြရပေသတည်း။ နောင်ခေတ်ကာလအလျှောက် အလျဉ်းသင့် ဆက်လက်ဖော်ပြပါဦးမည်ဟု အာသီသဟိခပါကြောင်း။
ဓည၀တီပြည်တွင် ဦးစွာအစ ဒင်္ဂါးပေါ်ပေါက်လာရခြင်း အကြောင်းရင်းမှာ အနောက်မဇ္ဈိမနီဝင်တရိုး တိုင်းကြီးပြည်ကြီးအပေါင်းနှင့် ကူးသန်းရောင်းဝယ်ရေးအတွက် လှည့်လည်သုံးစွဲခြင်းအလို့ငှာ ရွှေ၊ ငွေ၊ ကြီး ဒင်္ဂါးများကို ခပ်နှိပ်သုံးစွဲကြကုန်သတည်း။ ပဇာကာလမှ စတင်ဖြစ်ပေါ်သနည်းဟူမူ ရာဇ၀င်ဝါသနာထုံသူရို့သည် ရှိအကျဆုံးဖြစ်သော မြို့တော်ဟောင်းများသို့ လိုက်လံရှာဖွေကြသောအခါ ရခိုင်ပြည်တွင် အဟောင်းဆုံးဒင်္ဂါးခေါ် ဆတ်တံဆိပ်ဒင်္ဂါးများကို တွိသည်။ အချို့သော ရာဇ၀င်ဆရာရို့က ၄င်းဒင်္ဂါးကို (မာရာယုဒင်္ဂါး) ဟု အယူအဆရှိကြသည်။ ဒင်္ဂါးတွင်လည်း စာပီအက္ခရာ အမှတ်အသား တစုံတခုမှမပါ။ ဆတ်ရုပ်တခုတည်းသာလျှင် ခပ်နှိပ်လျှက်ပါဟိပြီးလျှင် ဒင်္ဂါး၏အနားနှင့်အသားပြင်ရို့မှာ ပွန်းပဲ့ပျက်ပြိုလုခန့်ဖြစ်နီသည်။ အဟောင်းဆုံးဒင်္ဂါးတော့မှန်ပါ၏။ သက္ကရာဇ် နိစွဲမပါ၍ မဝေခွဲနိုင်။ သို့သော် ရာဇ၀င်သက်ကြီးရို့က ထင်မြင်ချက်တခုပီး၍ ရွီးသားမှတ်တမ်းတင်ထားခသည်မှာ ပဉ္စမမြို့တော် မဉ္စူသိမ်မင်းသည် (ခေတ္တသင်လည်းခေါ်၏) ဆတ်တံဆိပ်ခပ်နှိပ်အပ်သော ဒင်္ဂါးများကို ခပ်နှိပ်သုံးစွဲဖူးကြောင်း ရာဇ၀င်ဟောင်းကျမ်း၏ ထွက်ဆိုချက်အရ ဟုတ်လိမ့်နိုးဖြင့် မဉ္စူသိမ် (ခေတ္တသင်) ခေါ် (တိုင်းချစ်မင်း) လက်ထက်တွင် သုံးစွဲကြောင်းဟူပေ၏။
သို့သော် ပထမဖော်ပြရင်း မာရာယုဒင်္ဂါးလည်းလွန်လွန်းသည်။ ပဇာကြောင့်ဆိုသော် မာရာယုမင်း ဂေါတမဘုရားပွင့်တော်မမူမှီ ကာလကပင် ဘိုးတော်အဉ္ဇနနှင့် ကာဠဒေ၀ီလ ရသေ့ရို့ မဖြိုသိမ့်သော သက္ကရာဇ် (၆၀၅၇) တွင် မင်းဖြစ်သောသူဖြစ်သောကြောင့် ထိုခေတ်ကာလအချိန် ဒင်္ဂါးကို မသုံးစွဲကြ။ ရွှေဒိုင်ခွက်ငွေဒိုင်ခွက်များကိုရာ သုံးစွဲကြောင်း ဃောသကသူဌေးကြီးဝတ္ထုကို ထောက်ရှု၍သိနိုင်သည်။ ထို့ကြောင့် ယုတ္တိမထင်ရှားချေ။ မဉ္ဇူသိမ်ခေါ် တိုင်းချစ်မင်းလက်ထက်တွင် ရာဇ၀င်သက်ကြီးရို့ ဖော်ပြကြသည်မှာလည်း နောက်သို့ဆုတ်လွန်းသည်ဟု ထင်ပါသည်။ ပဇာကြောင့်ဆိုသော် ပထမဝေသာလီမြို့တော်ဟောင်းတွင် ရှာဖွေရဟိသော ဒင်္ဂါးအချို့မှာ သက္ကရာဇ် (၁၅၀) ကျော်အတွင်းက ကျရောက်ပြီးလျှင် အက္ခရာစာများမှာလည်း သက္ကဋနာဂရီ၊ အူရဒူ အာရေဗီအက္ခရာသက်သက်ဖြင့်သော်လည်းကောင်း နွားရုပ်လူရုပ်ဖြင့်သော်လည်းကောင်း ခပ်နှိပ်ထုလုပ်၍ တွိရပေသည်။
ထို့ကြောင့် ဖော်ပြပြီးသော ဆတ်တံဆိပ်ဒင်္ဂါးမှာ စာပီမသုံးစွဲမှီကာလကသော်လည်းကောင်း၊ မာရာယုမင်း၏နောက်ဆုံးအဆက်မှသော်လည်းကောင်း ပေါ်ထွက်ဟန်လက္ခဏာရပေ၏။ ထိုစဉ်အခါမှစ၍ ငွေသားဒင်္ဂါး၊ ရွှေသားဒင်္ဂါး ကြီးပြားဒင်္ဂါး သုံးစွဲလာကြသည်။ ယခုဖော်ပြပါ မြောက်ဦးခေတ်အလယ်မှ အဆုံးတိုင်အောင် ဒင်္ဂါးရို့မှာ သီရိသုဓမ္မာရာဇာဒင်္ဂါးတပြားသာလျှင် ရခိုင်စာတဘက် အူရဒူနှင့် ဟိန္ဒူဘာသာရောနှော၍ ခပ်နှိပ်ထားသည်။ နရပတိမင်းအစ မဟာသမတရာဇာအဆုံးတိုင်အောင် ဒင်္ဂါးရို့မှာ (၂) ဘက်လုံးတွင် ရခိုင်အက္ခရာသက်သက်ဖြင့် ခပ်နှိပ်ထားသည်။ ရခိုင်ပြည်တွင် သက္ကရာဇ် (၁၁၄၄) ခုနှစ်နန်းတက်၍ (၁၁၄၆) ခုတွင် နန်းကျသောမဟာသမတရာဇာအဆုံးတွင် အမရပူရဘိုးတော် သိမ်းပိုက်အုပ်စိုးသည်။ ထိုအခါတွင် ဘိုးတော်သည် ငွေသားဒင်္ဂါခပ်နှိပ်သုံးစွဲသည်။ ဤမျှဖြင့် တတိယမြောက်ဦးခေတ်အလယ်ပိုင်းနှင့် နောက်ဆုံးပိုင်းဒင်္ဂါးများအကြောင်းကို အနည်းငယ်ဖော်ပြခြင်းဖြစ်ပေသည်။ ကျန်ဒင်္ဂါးများအကြောင်းကိုလည်း ဆက်လက်ဖော်ပြရန် အာသီသဟိခပါကြောင်း။
(ဦးသာထွန်း)
ဓါတ်ပုံအစစ်အမှန် မြောက်ဦးခေတ်င်္ဒဂါးတချို့
No comments:
Post a Comment