ဆရာကြီးဦးသာထွန်း အတ္ထုပ္ပတ္တိအကျဉ်း

ဆရာကြီးဦးသာထွန်း အတ္ထုပ္ပတ္တိအကျဉ်း
==========================

ဆရာကြီးဦးသာထွန်းကို ရခိုင်ပြည်၊ မြောက်ဦးမြို့ ညောင်ပင်ဈီးရွာ ဘကောင်းစံရွှီ၊ မိအောင်ကြွဇံရို့မှ ၁၉၁၇ ခု၊ နိုဝင်ဘာလ ၂၃ ရက်၊ သောက်ကြာနိတွင် ဖွားမြင်သည်။ တဦးတည်းသောသားဖြစ်သည်။ ငယ်စဉ်မှစ၍ အဘိုးဖြစ်သူ ရာဇဝင်ဆရာကြီး ဦးသာထွန်းအောင်က ရခိုင်ရာဇဝင်၊ ဆီးကျမ်း၊ နက္ခတ်ကျမ်း၊ ပူရာဏ်ကျမ်းများအား နုတ်တိုက်အာဂုံ သင်ကြားပီးခသည်။ နဝမတန်းတွင် ပညာသင်ကြားနီစဉ် ဖခင် ကွယ်လွန်သောကြောင့် ကျောင်းထွက်လိုက်ရပြီး ရဟန်းပုဂ္ဂိုလ်များထံတွင် သက္ကဋ၊ ပါဠိ၊ သမိုင်း၊ အင်း၊ ဗေဒင်နှင့် အခြားလောကီပညာရပ်များကို သင်ကြားလေ့လာ ဆည်းပူးသည်။

၁၉၅ဝ ခုနှစ်မှ ၁၉၅၅ ခုနှစ်ထိ မူလတန်း ကျောင်းဆရာအဖြစ် ဝင်ရောက်လုပ်ကိုင်ပြီး၊ ၁၉၅၅ ခုနှစ်မှ ၁၉၇၇ ခုနှစ်ထိ မြောက်ဦးမြို့ ရှိဟောင်းသုတေသနဌာနခွဲတွင် ရခိုင် မြန်မာပဏ္ဍိတ်အဖြစ် တာဝန်ထမ်းဆောင်သည်။ ယခုလက်ဟိ မြောက်ဦးမြို့ ရှိဟောာင်း သုတေသနပြတိုက်ကြီးသည် ဆရာကြီး စုဆောင်းတည်ဆောက်ခသော ပြတိုက်ကြီးဖြစ်သည်။

၁၉၇၇ ခုနှစ် မှ ၁၉၈၃ ခုနှစ်ထိ မြောက်ဦးမြို့ ရှိဟောင်းသုတေနဌာနခွဲတွင် အကြံပီးပုဂ္ဂိုလ်အဖြစ် ဆက်တိုက်တာဝန် ထမ်းဆောင်ခသည်။

၁၉၈ဝ ခုနှစ်မှ ၁၉၈၃ ခုနှစ်ထိ တူးဖော်ခသော ရခိုင်ဝေသာလီမြို့ဟောင်း တူးဖော်မှုလုပ်ငန်းတွင် ကိုယ်တိုင်ကိုယ်ကျ ပါဝင်တူးဖော်ဆောင်ရွက်ခသည်။

မြောက်ဦးမြို့ဘုရားသမိုင်း (၁၃ဝ၁ ခုနှစ် ပုံနှိပ်)၊ ဦးရာဇ်တောင် ဘုရားသမိုင်းကျမ်း ပျင်ဆင် ဖြည့်စွက်ချက် (ပုံနှိပ်) (၁၉၅၂ - ၅၃)၊ ရက္ခိုင်အမျိုးသမီးသူရဲကောင်း အတ္ထုပတ္တိ (၁၉၅၃ - ၅၄) (ပုံနှိပ်)၊ ရက္ခိုင်ရာဇဝင် သင်္ခေပကျမ်း (၁၉၅၄ - ၅၅) ပုံနှိပ်၊ ဝသဲဘုရားသမိုင်း (ပုံနှိပ်)၊ ရှင်သတ် ဘုရားသမိုင်း (ပုံနှိပ်) များအား ပုံနှိပ်ထုတ်ဝီခသည်။ ရက္ခိုင်ကဗျာပေါင်းချုပ်၊ ရက္ခိုင်ရာဇဝင် ဘာသာပြန်၊ ရက္ခိုင်ဒင်္ဂါးများ (ဘာသာပြန်)၊ ရက္ခိုင်ဓာတ်တော်ဘုရားစေတီများနှင့် မြောက်ဦးမြို့ တန်းခိုးကြီးဘုရားများသမိုင်း ကျမ်းစာများကို ရွီးသားပြုစုပြီး ဘဏ္ဍာရေးဝန်ကြီး ဆာဦးထွန်းအောင်ကျော်ထံတွင် အပ်နှံ့ခသည်။

အံတော်သိမ် ဘုရားသမိုင်းကျမ်း၊ သဲထက် ဘုရားသမိုင်း၊ ထီးတော်မိုး ဘုရားသမိုင်း၊ ဘောင်းဒွတ်နတ်တောင် ဘုရားသမိုင်း၊ ဝေသာလီဘုရားကြီးသမိုင်း၊ သိမ်တော်ကြီး ဘုရားသမိုင်း၊ မဟာထီး ဘုရားသမိုင်း၊ ပါးတော် ဘုရားသမိုင်း၊ ဘုရားပေါ် ဘုရားသမိုင်း၊ သျှစ်သောင်း ဘုရားသမိုင်း၊ မင်္ဂလာဓာတ်ရွှေကူ ဘုရားသမိုင်းများကို လင်္ကာစကားပြေ မော်ကွန်းစသည့်အားဖြင့် ရွီးသားထုတ်ဝီခသည်။

ဓညဝတီမဂ္ဂင်း အယ်ဒီတာ စာတည်းအဖြစ် တာဝန်ယူခသည်။ ဓညဝတီစာစောင်၊ ဓညဝတီမဂ္ဂဇင်း၊ ရခိုင်တန်ဆောင်မဂ္ဂဇင်း၊ မန္တလေးပြည်သူ့ဂျာနယ်၊ ရန်ကုန်မဂ္ဂဇင်း၊ စုံထောက်မဂ္ဂဇင်း၊ ယဉ်ကျေးမှုစာစောင်၊ ရခိုင်မဂ္ဂဇင်း၊ စစ်တွေ ကောလိပ်မဂ္ဂဇင်း၊ ရခိုင်ပြည်နယ်စာစောင်၊ ဝရာဇ်မြီမဂ္ဂဇင်းများတွင် ဦးဦးသာထွန်း၊ ဦးသူရိယ အစဟိသော ကလောင်နာမည်များဖြင့် ဆောင်းပါးမျာစွာ ရွီးသားခသည်။

မြို့စောင့်နတ် ဒေဝတာဗလီ ပူဇော်ကျမ်း၊ အဉ္ဇနနိဒါန်း ဆီးကျမ်း၊ ရခိုင်စည်ပြုလုပ်ပုံနှင့် တီးကွက်တီးလုံးများ၊ ကဗျာများ စုပေါင်းစာတမ်း၊ ရခိုင်ထိမ်းမြားမင်္ဂလာ ပန်းတျားတီးလုံး၊ တီးကွက်နှင့် ပြုလုပ်ပုံ အတိုင်းအတာစာတမ်း၊ ရခိုင်သတ်ပုံသတ်ညွှန်းခွဲထားခြင်း အဓိပ္ပာယ်ထွက်ပုံ စာတမ်း၊ ရခိုင်ပလွီ (ပြွီ) အမျိုးမျိုးပြုလုပ်ပုံ အတိုင်းအတာစာတမ်း၊ သျှိုင်ဒိုင်၊ ကောက်ဦးဆွမ်းတင်၊ ပိုးဝါ၊ ဗုဒ္ဓပူဇနိယ ဆီမီးခွက်အက၊ တေးခြင်းကဗျာစသည်ရို့ကို ရွီးသားပြုစုခသည်။

ဆင်ယင်ထုံးဖွဲ့မှုကျမ်း (မူကြမ်း)၊ ရခိုင်ရာဇဝင် (မူကြမ်း)၊ ရခိုင်အက္ခရာ ဆင်းသက်လာပုံကျမ်း (မူကြမ်း)၊ ရခိုင် ကျောက်စာပေါင်းချုပ်ကျမ်း (မူကြမ်း)၊ ရခိုင်ဘုရင် သမိုင်းကျမ်း (မူကြမ်း)၊ ရခိုင်သား ဒေါင်းမာတင် (မူကြမ်း)၊ သျှင်မြဝါကျမ်း (မူကြမ်း)၊ ရခိုင်မင်းသမီးဧခြင်း ယှင်းလင်းချက် (မူကြမ်း)၊ ဗျာလစာတမ်း (မူကြမ်း)၊ ကျောက်တော်မြို့ သေလာဂီရီ မောပဗ္ဗတ တောင်ခြီရင်းမှတွိရသော ကျောက်ဆစ်လက်ရာများ သုတေသနပြုချက် (မူကြမ်း) စသည်ရို့ကို ရွီးသားပြုစုခသည်။

သြစတြေးလျနိုင်ငံ အမျိုးသားတက္ကသိုလ် သုတေသီ PAMELA GUTMAN ၏ ANCIENT ARAKAN ကျမ်း ပြုစုစဉ်တွင်လည်းကောင်း၊ ပြင်သစ်နိုင်ငံ၊ ပါရီမြို့မှ ပါမောက္ခ ရောဖတ်ဆာဗ်ရ် (BERNOT) အတွက် ရခိုင်ပုံပြင် လိပ်ကန်ဖာမ ဝတ္ထုနှင့် ကျီးဖြူရွာစာတမ်းများကိုလည်းကောင်း၊ ပြင်သစ်နိုင်ငံ ပါမောက္ခ ဦးလှသိန်း (ခေါ်) ဂျွန်န်အိုကဲလ်ဖို့၏ စေတီအဆောက်အအုံနှင့် နန်းအဆောက်အအုံစာတမ်းကိုလည်းကောင်း၊ အမေရိကန်နိုင်ငံ အာသျှဖောင်ဒေးချန်းအတွင်းရေးမှူး ဒေးဗစ်စတိမ်းဗန်၏ ဝေသာလီ ကျောက်ရုပ်ထု ဆင်းတုများ၏ နှစ်ပေါင်းကြာညောင်းမှုအား တိုင်းတာမှု စာတမ်းကိုလည်းကောင်း၊ ဂျပန်နိုင်ငံ ပါမောက္ခ အိုနိုတိုရရူနှင့် ရခိုင်စကားပြော လီယူလီသိမ်း အသံထွက်ပုံ စာတမ်းနှင့် ဘောင်းဒွတ်အရပ်တွင်ဟိသော ဒတ်ခ်ျ ကောင်ဆယ်လာ အဆောက်အအုံပုံစံနှင့် ကူးသန်းရောင်းဝယ်ရေးစာတမ်းကိုလည်းကောင်း ရွီးသားပြုစုရာတွင် ကူညီခသည်။

အစိုးရယဉ်ကျေးမှုဌာနနှင့် အခြားပုဂ္ဂိုလ်ရို့ကိုလည်း ဆရာကြီးသည် ကူညီပီးခသည်။ ဦးမင်းနိုင်၏ ပြည်ထောင်စု အကပဒေသာစာအုပ် (၁၉၅၉)၊ ရခိုင်တိုင်းရင်းသားလူမျိုးဖြစ်စဉ်နှင့် ဓလေ့ထုံးစံများစာအုပ်၊ တိုင်းရင်းသားယဉ်ကျေးမှု ရိုးရာဓလေ့ထုံးစံများ၊ ရခိုင်ပြည်နယ် ဘဏ္ဍာတိုက်ကြီးများကျမ်း၊ ရခိုင်ရိုးရာ စည်တော်နှင့် တူရိယာတီးကွက်များစာတမ်း၊ မြန်မာဝေါဟာရ အဘိဓာန်ကျမ်းပြုစုစဉ် ဝေါဟာရစာလုံးများ ပြုစုပီးပို့ခြင်း၊ ရခိုင် ဝေါဟာရအဘိဓာန်ပြုစုစဉ် ဝေါဟာရစာလုံးများနှင့် အဓိပ္ပါယ်ဖွင့်ဆိုချက်၊ ကျမ်းကိုးကားချက်များစာအုပ် ပြုစုခြင်း၊ ၁၉၇၆ - ၇၇ ခု ရခိုင်ပြည်နယ်နိ၊ ရခိုင်ပြည်နယ်၊တံဆိပ်၊ ရခိုင်ရိုးရာ ကျား/မ ဝတ်စုံ စာတမ်း၊ ရခိုင်ပြည်နယ် ဖြစ်စဉ်သမိုင်း၊ မြောက်ဦးလမ်းညွှန်စသည်ရို့ကို ပါဝင်ကူညီ ရွီးသားပြုစုခသည်။

အထက်တန်းပညာ ဦးစီးဌာနညွှန်ချုပ် (ငြိမ်း) ပါမောက္ခ ဦးစံသာအောင် အတွက်လည်း ၁၉၇၂ ခု အဘိဓမ္မာကောက်နုတ်ချက် ပုရပိုက်ကို မိုက်ခရိုဖလင် ရိုက်နှိပ်ရန်အတွက်လည်းကောင်း၊ ကဝိကဏ္ဍ ပါသဏကျမ်းပီမူကို မိုက်ခရိုဖလင် ရိုက်နိုင်ရန်လည်းကောင်း၊ လျှို့ဝှက်ကျောက်စာ ဂဏန်းရွီးနည်းပီမူကို မိုက်ကရိုဖလင် ရိုက်ရန်လည်းကောင်း၊ အေဒီ ၆ ရာစုနှင့် ယင်းမတိုင်မီက ရခိုင်ပြည်နယ်သုံး အက္ခရာစာအုပ်ပြုစုရာတွင်လည်းကောင်း၊ အနန္ဒစန္ဒြား ၈ ရာစု ရခိုင် ဝေသာလီစာအုပ် ပြုစုရာတွင်လည်းကောင်း၊ ရခိုင်ဒင်္ဂါးများသမိုင်း ပြုစုရာတွင်လည်းကောင်း၊ ဗုဒ္ဓအနုပညာ (Buddhist Art of Ancient Arakan) စာအုပ်ပြုစုရာတွင်လည်းကောင်း ပါဝင်ကူညီခသည်။

၁၉၅၉ ခုနှစ်မှာ မြန်မာ့အသံ ရေဒီယိုမှ ရခိုင်အသံကို အစအဆုံး အသံလွှင့်ထုတ်ခသည်။ တိမ်မြှုပ်ပျောက်ကွယ်လားခပြီးဖြစ်သော ရခိုင်ယဉ်ကျေးမှုအမွီအနှစ်၊ ရခိုင်သမိုင်း၊ ရခိုင့်စာပီ၊ ရခိုင့်ရိုးရာ ဓလေ့ထုံးတမ်းစဉ်လာများအား ကမ္ဘာသိအောင် ရှာဖွီစုဆောင်း လေ့လာဖော်ထုတ်ခသည်။ ထိန်းသိမ်းစောင့်ယှောက်ခသည်။ ရခိုင်သူ၊ ရခိုင်သားများကိုလည်း ရခိုင့်ယဉ်ကျေးမှုအမွီအနှစ်၊ ရခိုင့်သမိုင်း၊ ရခိုင့်စာပီ၊ ရခိုင့်ရိုးရာ ဓလေ့ထုံးတမ်းစဉ်လာများကို ဖော်ထုတ်ထိန်းသိမ်း ကာကွယ်စောင့်ယှောက်ရန်လည်း အမြဲဆော်သြခသည်။

ဆရာကြီးသည် ရခိုင့်ယဉ်ကျေးမှုအမွီအနှစ်၊ ရခိုင့်သမိုင်း၊ ရခိုင်စာပီ၊ ရခိုင့်ရိုးရာ ထုံးထမ်းစဉ်လာများကို အစဉ်ဖော်ထုတ်ပြုစုခသော ရာဇ၀င်ဆရာ ဖခင်ကြီးတဆူဖြစ်သည်။

ဆရာကြီးသည် ရခိုင် ဒီမိုကရေစီရဟိရေး၊ တိုင်းရင်းသားများ တန်းတူအခွင့်အရေး ရဟိရေးအတွက်လည်း စွမ်းစွမ်းတမံ ရှိတန်းမှ ဦးစီးဆောင်ရွက်ခသည်။ ရခိုင် ဒီမိုကရေစီ အဖွဲ့ချုပ်တွင် နာယကကြီးအဖြစ် တာဝန်ထမ်းဆောင်ပြီး၊ ကျောက်တော်မြို့ မဲဆန္ဒနယ် အမှတ် (၁) တွင် ယှဉ်ပြိုင်မည့် ပြည်သူ့လွှတ်တော် ကိုယ်စားလှယ်လောင်းလည်းဖြစ်သည်။ ဆရာကြီးသည် ရခိုင်ဒီမိုကရေစီအဖွဲ့ချုပ်၏ စည်းရုံးရေးခရီးစဉ်အဖြစ် အနယ်နယ်အရပ်ရပ်သို့ မဲဆွယ်တရားဟောထွက်စဉ် မင်းပြားမြို့နယ်၊ ပြားချောင်းကျွန်းရွာ မဲဆွယ်တရားဟောပွဲတွင် တရားဟောနီစဉ် ဖက်ခွက်များကဖမ်းဆီးပြီး ထောင်သွင်းအကျဉ်းချ ခံခရသည်။

ဆရာကြီးအား အမျိုးသားရေးတရားဟောသည်စသည်ဖြင့် အမျိုးမျိုးစွဲချက်တင်ပြီး ဖမ်းဆီးခြင်ဖြစ်သည်။ ဖက်ခွက်များက တိုင်းပြည်အပေါ် မတရားကျူးကျော်စော်ကားမှုများကို ဆရာကြီးက အချက်ကျကျ ဝေဖန်ဟောပြောမှုများကြောင့် ဖက်ခွက်များ၊ မျန်မာလူမျိုးငယ်ဝါဒီများမှာ အနာပေါ်ဒုတ်ကျသကဲ့သို့ ဆတ်ဆတ်ထိ မချိမခံမရပ်နိုင် ဖြစ်ခရသည်။

ယင်းကြောင့် ဖက်ခွက်များက ဆရာကြီးအား အငြိုးထားကာ မတရားဖမ်းဆီးခြင်းဖြစ်ပြီး ထောင်ဒဏ် ၃ နှစ် အပြစ်ပီးကာ စစ်တွေထောင်တွင် အကျဉ်းချထားသည်။ ထောင်ကျပြီး ၅ လ အကြာ ၁၉၉ဝ သြဂုတ် ၁၄ ရက်နိတွင် ကွယ်လွန်သည်။ ထောင်ထဲတွင် ဖက်ခွက်များက ဆရာကြီးအား အဆိပ်ကျွေး၍ လုပ်ကြံလိုက်သည်။ ယေကေလည်း ဖက်ခွက်များက ဆရာကြီး သီဆုံးရခြင်းသည် ဦးဂေါင်းတွင် သွီးမတိတ်သည့် ရောဂါ (Cerebral Haemorrhage) ဖြင့် သီဆုံးရခြင်းဖြစ်ကြောင်း The Truth အမည်ဟိဆောင်းပါးများဖြင့် လုပ်ကြံဖန်တီးဝါဒဖြန့်သည်။

ဆရာကြီး၏အလောင်းကို သူ၏ဇာတိချက်ကြွီ မြောက်ဦးမြို့သို့ ယူဆောင်လာပြီး ဆရာကြီး အလွန်တန်ဖိုးထားခသော ရန်အောင်ဇေယျ (ခေါ် ) သျှစ်သောင်းပုထိုးတော်ကြီး ဘုရားရိပ်တွင် မြီမြှုပ်သင်္ဂြိုဟ်လိုက်ရသည်။


http://thelightofarakan.blogspot.com/2010/07/blog-post_784.html မှ ကူးယူဖော်ပြသည်။ လိုအပ်သည်များကို အနည်းငယ်ဖြည့်စွက်ပျင်ဆင်ထားသည်။