သာနုပန်း
=======
တောင်ကလီလာ မြောက်လီလာကေ
ရင်မှာအီးချမ်း
ငယ်ကချစ်ကို တဇလွမ်း။
ငယ်ကချစ်နှင့် ကြီးချစ်မတူ
ငယ်ကချစ်က ရစ်ပတ်တေဝေ
ကြီးခါချစ်က ရင့်ခါးရေလေ။
ထမင်းထုပ်နှင့် ဟင်းထုပ်သိုးမေ
ငယ်ကချစ်ပိုင် ရခဲရေ။
အရှိဒေမှာရာလည်း သျှင်မ
အသျှင်မမှာ မြင်ရေရင်သွီး
လုံးတန်းနှင့် ရပ်တန်းညီကေ
ညိုမောင်ထွီး။
မချင်ဒေမှာရာလည်း လိုက်ဖက်
မယင်ဒေမှာရာလည်း လိုက်မိ
တယောက်မောင်ကား
သူတပါးနှင့် ပျော်ရို့တွိ။
မျက်စိဆင်းရဲ နားဆင်းရဲ
ကုသိုလ်ကံကို ဝမ်းလည်းနည်း။
မရိုးထောင် ပြိုင်းတောင်ကျော်လမ်း
ခမောင်းပင်မှာ သာနုပန်း။
သူကမလို လူဇာမသိ
သာနုပန်းက ပင်တံရိုးမှာ
ညှိုးလို့ဟိ။
နှုတ်သီးဝင်းရောင် ခြီဖျားညိုလှ
တောသုံးထောင်မှာ ဖော်ကိုတကေ
ဖိုးခေါင်မ။
ပင်လုံးတိုင်းမှာရာလည်း မျက်ရည်
တောင်လုံးတိုင်းမှာရာလည်း မျက်စိ
ဖိုးခေါင်မကား ကိုယ့်ဖော်ရွီကို
ရှာမတွိ။
တတိုင်းပြည်နှင့် ချောင်းကြီးလည်းခြား
မောင်နှင့်မေ့ကို ခွဲလို့ထားရေ။
ပတ္တမြားမျက်ရှင် ရွှီစင်လက်စွပ်
အဖိုးတန် မေ့ကိုပန်လို့ ပီးပါခလိုက်။
(ဗိုလ်မင်းထောင်က ဇမ်းကဗျာ)
Khaing Soe Than Aung ကျေးဇူးပြုသည်။
No comments:
Post a Comment