ရခိုင်ပြည်
======
မိုးရီချိန်လက်မ (၂၀၀) ကျော်ရွာပြီးကေ
ရီယှားရေ တိုင်းပြည် --။
ကိုယ့်စာကို ကိုယ့်စကားနှင့်မရွီး
သူများစကားနှင့် အငှားရွီးရေ တိုင်းပြည် --။
ရွှေကျင် သုဓမ္မ ကံဒွါရ
မြန်မာဘုန်းကြီးဂိုဏ်းတိ ထွန်းကားရေ တိုင်းပြည် --။
စေတီအပြိုအပျက်နှင့်
ဘုရားမျက်ပြူးပေါရေ တိုင်းပြည် --။
အမြင်ကျယ် အာကျယ် လူကျယ် လူတွင်ကျယ်
(---) ကျယ်တိများရေ တိုင်းပြည် --။
ရခိုင်ပြည်မှာနီပြီးကေ
ကုလားခွတ်လို့
ထွက်ပြီးရရေ တိုင်းပြည် --။
အဆိုးထုပ်နှင့်
အညှက်ဆိုးပေါရေ တိုင်းပြည် --။
အာရီယံဆိုပြီးကေ
အသားမဲရေ တိုင်းပြည် --။
ဘုရားပွဲမှာ
ခရမ်းသီးဇတ်ကရေ တိုင်းပြည် --။
တော်လှန်ရီးလုပ်တိုင်း
ဒုံးပေါက်ဆောက်တေ တိုင်းပြည် --။
ရခိုင်ဧက ဒွေးမရ
အမည်နာမမှာ
မင်းရူးများရေ တိုင်းပြည် --။
လိမ္မာမြင်ပြင်း ဆင်းရဲအားရ
ကြွယ်ဝမနာလို ကိုယ့်ထက်သာမကြိုက်
အမိုက်လေးပါး ထွန်းကားရေ တိုင်းပြည် --။
ပါတီဥက္ကဌက
မဲမရရေ တိုင်းပြည် --။
ဓညဝတီပက္ခဒိန်ကို
မြန်မာနိနှင့်ထုတ်တေ တိုင်းပြည် --။
အမျိုးသားနိတခုတည်းကို
(နိန့်) (နေ့) (နိ့)(နိ)
လေးစိကွဲရေ တိုင်းပြည် --။
တတိုင်က (နဲ့)
တတိုင်က (ဧ့)
တတိုင်က (မာ)
ရခိုင်ဝဏ္ဏအက္ခရာ ထွန်းကားရေ တိုင်းပြည် --။
ကျောက်စာနှင့်
မျောက်စာထွန်းကားရေ တိုင်းပြည် --။
အတတ်ဆန်းနှင့်
အချွန်းတပ်တိများရေ တိုင်းပြည် --။
မြန်မာ (တစ်) ကေ ရခိုင် (တစ်)
မြန်မာ (ပြူး) ကေ ရခိုင် (ပြူး)
သာလှဦးတိပေါရေ တိုင်းပြည် --။
ရခိုင်မဂ္ဂဇင်းကို
မြန်မာပိုင်ယှောင်ရွီးရေ တိုင်းပြည် --။
ရခိုင်ဖြစ်ပြီးကေ
မြန်မာကို မဲပီးရေ တိုင်းပြည် --။
မြန်မာစစ်တပ်မှာ
ရခိုင်သား သူရဘွဲ့ရရေ တိုင်းပြည် --။
သဇင် ရိုးထက်မှာ မပွင့်
တုံးထက်မှာပွင့်ရေ တိုင်းပြည် --။
ရခိုင်ဘုရင်
ပုဏ္ဏားခေါင်းပေါင်း ဆောင်းရေတိုင်းပြည် --။
အိမ်ကထွက်တေ (Gas) ကို
သူများတိုင်းပြည်ရောင်းပြီး
ထင်းနှင့် ထမင်းချက်တေ တိုင်းပြည် --။
မြစ်ချောင်းအင်းအိုင်ပေါပြီး
ရီအားလျပ်စစ်မဟိရေ တိုင်းပြည် --။
ပင်လယ်လီကို လျှူ
ဝမ်းပူပူနှင့်
လီအားလျပ်စစ်ထုတ်တေ တိုင်းပြည် --။
နွီခါ ရီခမ်း
မိုးခါ ရီကြီးရေ တိုင်းပြည် --။
လူဂတုံးနှင့်
တောင်ဂတုံးတိပေါရေ တိုင်းပြည် --။
သစ်ပင်ကို ခွတ်
ပြန်မစိုက်တတ်တေ တိုင်းပြည် --။
ပင်လယ်ကမ်းစပ်မှာ မွီးပြီးကေ
ထိုင်းဘုတ်မှာ
ငါးဖမ်းလုပ်တေ တိုင်းပြည် --။
(ဖက်ခွက်) ကို
(ယောက်ဖ) ခေါ်ရေ တိုင်းပြည် --။
(ဗချီး) က
(ယခီး) လို့ ခေါ်ရေ တိုင်းပြည် --။
"မြေပွေးနဲ့ရခိုင်တွေ့ရင်
ရခိုင်ကို အလျင်သတ်"
"မြေခွေးမြန်မာ တတူလာ
မြန်မာကိုသတ် ခွီးကိုလွှတ်"
"(ဗ) ပါကေ (ဗူး) ပင်ကိုလည်းခွတ်"
လှောင်ကြက်အချင်းချင်း
အိုးမဲသုတ် ခွတ်နီကတ်တေ တိုင်းပြည် --။
ဇန္နဝါရီလ (၁) ရက် "ရခိုင့်တော်လှန်ရီးနိ" ကျ
ကျင့်ပကတ်ဖို့ သတိမရ
ဒီဇင်ဘာလ (၃၁) ရက် "လဒမှိုင်နိ" ကျ
အခြင်းကြီးချ ငိုကတ်တေ တိုင်းပြည် --။
ဆုတ်လခြမ်း
လေးခြမ်းခြမ်းရေ တိုင်းပြည် --။
ဘုရားရောက်တေဆိုပြီးကေ
ကရားငါးပါးမှောက်တေ တိုင်းပြည် --။
"သာကီဝင်" လို့
ဘဝင်မြင့်ပြီးကေ
အောက်ခြီလွတ်တေ တိုင်းပြည် --။
ဝါးလုံးခေါင်းထဲက
လပရေ တိုင်းပြည် --။
ခြင်ထောင်ထဲက
ပစိကိုက်ပြ လျှာထုတ်ပြ
လက်သီးဆုတ်ပြ သွားခြဲပြ
မျောက်ခြောက် တိုင်းပြည် --။
တွင်းအောင်းဖား
အသံကြောင့်သီရေ တိုင်းပြည် --။
မမနှင့်နှုံးရန်ဖြစ်
မဆီမဆိုင် ပရံလူကို
အမိအဖနှင့်တရစ် တိုက်ခိုက်
အောက်တန်းစားတိလည်း ဟိရေ တိုင်းပြည် --။
တခုပြီးတခု ပြဿနာစု
မလာဥ တိုင်းပြည် --။ ။
(မောင်ပေါက်တူး)
ဒီဇင်ဘာ (၃၁) ရက် ၂၀၁၆ လဒမှိုင်နိအကြို ရွီးစပ်သည်။ :)
